Sekretari amerikan i Shtetit Antony Blinken po qëndron në Izrael ku bëri thirrje për mbrojtjen e civilëve palestinezë. Ai tha se duhet të rifillojë puna për zgjidhjen e konfliktit përmes krijimit të dy shteteve. Ndërkohë, shtohen shqetësimet se konflikti mund të zgjerohet, ndërsa sot udhëheqësi i grupit militant Hezbollah paralajmëroi përshkallëzim të luftimeve në kufirin verior te Izraelit me Libanin. Aleksandar Vulin, politikani pro rus dhe shefi i Agjencisë Serbe të Zbulimit dha sot dorëheqjen, katër muaj pasi u sanksionua nga Shtetet e Bashkuara për korrupsion dhe veprime destabilizuese. Ai akuzoi Shtetet e Bashkuara dhe Bashkimin Europian se po kërkonin ndëshkimin e tij si parakusht për mos vënien e sanksioneve ndaj Rusisë. Departamenti i Shtetit shpalli non-grata ish-kreun e prokurimit të Kosovës, Nexhat Krasniqi për përfshirje në korrupsion.