Në Tiranë tregtarët protestuan sot përsëri kundër taksave të reja të vendosura nga bashkia për këtë vit, duke i quajtur ato të papërballueshme. Por drejtuesit e bashkisë pohuan se ato u hartuan për të liruar hapësirat publike nga tregtarët.
Your browser doesn’t support HTML5
Shqiperi: Protestë e tregëtarëve
Disa qindra tregtarë të vegjël e të mesëm protestuan sot para bashkisë së Tiranës për rritjen e taksave vendore, duke i quajtur të papërballueshme.
Në tubimin që zgjati mbi dy orë ata theksuan se taksat e mëparshme i kishin vënë në vështirësi të mëdha, ndërsa taksat e reja janë dhjetëfishuar në disa raste dhe në disa raste janë futur taksa të reja.
Përfaqësues të tyre folën për gjendjen e vështirë që po përballen dhe për taksat e rritura nga janari, duke u kujtuar politikanëve socialistë premtimet e tyre elektorale për biznesin e vogël.
Nga ana e saj bashkia ka deklaruar se vendimi për taksat është një procedurë e zakonshme dhe se shumat e mbledhura do të shkonë në të mirë të kryeqytetit.
Tregtarët kërkuan dialog me drejtuesit e bashkisë dhe në mbrëmje u zhvillua një takim me përfaqësues të dy palëve.
Ata deklaruan se taksat e reja janë vendosur në kundërshtim me ligjin për funksionimin e qeverisjes vendore dhe në kundërshtim me ligjin për taksat vendore.
Protestuesit pohuan se taksat janë të papërballueshme dhe shumë prej bizneseve mund të mbyllen sepse janë duke falimentuar.